Министерството за енергетика, рударство и минерални суровини соопшти дека презема конкретни мерки за повисоко вреднување на природните ресурси, доследно исполнување на концесиските обврски и поефикасен надзор во рударството – зголемени се концесиските надоместоци, наплатата во 2025 година надмина 1,2 милијарда денари, евидентирани се 53 раскинати концесиски договори, а во 2026 година инспекцискиот капацитет е зајакнат со тројца дополнителни инспектори.
Со новиот тарифник, во примена од 1 јануари 2025 година, кај металичните минерални суровини концесискиот надоместок е зголемен од 2 на 4 %, а кај мермерот од 1 на 5 %. Со овие измени се зголемува финансиската обврска на концесионерите за користењето на природните ресурси, како и придонесот што државата го остварува од нивната експлоатација.
– Вкупната наплата од концесиски надоместоци во 2024 година изнесувала речиси 561,5 милион денари, а во 2025 година достигнала околу 1,222 милијарда денари. Тоа претставува зголемување од повеќе од 660 милиони денари независно од даноците и придонесите што компаниите ги плаќаат по други основи. Паралелно со подобрената наплата, Министерството постапува и во однос на концесиските договори. Растот на наплатата произлегува од повисоките надоместоци, засилените теренски проверки, писмените опомени и поодлучното постапување кон концесионерите што не ги исполнуваат обврските. Раскинувањето на договорите и зајакнувањето на инспекцискиот надзор се дел од пристапот во кој концесијата подразбира јасни обврски, а плаќањето надоместок не ги ослободува операторите од исполнување на техничките услови и обврските за заштита на животната средина – информира Министерството.
За долгорочно и системско уредување на секторот е донесена стратегијата за геолошки истражувања и одржливо искористување и експлоатација на минералните суровини за периодот 2026 – 2046 година, со експертски придонес од МАНУ, а за документот е спроведена стратегиска оцена на влијанието врз животната средина и јавна расправа. Стратегијата ги поврзува економските цели со заштитата на животната средина и социјалните аспекти, а содржи и акциски план за периодот 2026 – 2030 година. Таа обезбедува рамка за планирање, спроведување и следење на мерките за развој на секторот.
Министерството работи и на нови законски решенија во областа на рударството и геологијата. Предложената рамка предвидува финансиско покритие од 100 отсто на проценетите трошоци утврдени со соодветниот план за управување со рударски отпад и поврзаните обврски.
– Со тоа, наместо сегашниот модел во кој гаранцијата изнесува речиси една третина од проценетите трошоци, финансиската обезбеденост би била приближно трипати построга. Целта е да се зајакне финансиската одговорност на операторите и навреме да се обезбедат средства за санација, рекултивација и обврските по затворањето на рударските капацитети. Во подготовката на законските решенија беше овозможено учество на јавноста преку ЕНЕР, вклучително и на експерти, општини, компании, граѓански организации и поединци. На веб-страницата на Министерството се објавени регистри на концесиски договори, список на одземени концесии, како и регистри на овластувања и лиценци за рударски проекти и геолошка документација. Објавувањето на овие документи овозможува проверка на конкретни информации и придонесува за поголема транспарентност во секторот – наведува Министерството во соопштение.
Посочува и дека минералните суровини имаат потенцијал да поттикнат инвестиции, отворање работни места и развој на домашната економија, но сепак економскиот потенцијал на одреден проект не ги заменува законските услови за негово одобрување и реализација.
– Секој проект мора да се разгледува и од аспект на влијанијата врз водата, почвата, воздухот, здравјето на луѓето, земјоделството и другите дејности во засегнатото подрачје. Потребно е јасно да се разликуваат геолошкото истражување, просторниот план, концесијата и дозволата за експлоатација бидејќи секој од овие инструменти има поинаква правна функција. Наведувањето минерално наоѓалиште или рударска намена во плански документ само по себе не претставува дозвола за отворање рудник. Исто така, концесијата не ги заменува другите задолжителни постапки, еколошки акти и одобренија. Министерството постапува во рамките на своите законски надлежности, а постапките за заштита на животната средина се водат пред надлежните органи за животната средина. Надзорот го вршат два посебни инспекциски органи, секој во рамките на своите надлежности: Државниот инспекторат за енергетика, рударство и минерални суровини (рударски, геолошки и технички прописи) и Државниот инспекторат за животна средина (заштита на животната средина). Кадровското зајакнување на првиот ќе продолжи. Секоја институција е одговорна за законитоста, утврдените услови и образложението на актите што ги донесува. Прашањата на граѓаните поврзани со водоснабдувањето, земјоделството, отпадот и локалниот развој заслужуваат сериозен третман и конкретни, проверливи одговори – соопшти Министерството за енергетика.
Министерството укажува дека „партизацијата на ова прашање и ширењето површни или непроверени информации ја отежнуваат информираната јавна расправа“ и дека „изедначувањето плански документ со дозвола за отворање рудник е правно погрешно и создава неоправдан страв кај граѓаните“.
– Политичките партии, вклучително и опозицијата, имаат одговорност своите ставови да ги темелат на документи и проверливи факти, а не на селективно избрани податоци и политички квалификации. Користењето на загриженоста на граѓаните за придобивање гласачи, наместо за разјаснување на фактите, претставува злоупотреба на тема од сериозен јавен интерес. Граѓаните имаат право да очекуваат одлуките да се носат врз основа на закон, стручна оценка и јасно утврдени услови. Секоја постапка во надлежност на Министерството ќе се води во согласност со важечките законски прописи и применливите европски стандарди за заштита на животната средина и безбедност. Министерството нема да носи одлуки ниту по налог на инвеститор ниту под политички притисок, туку исклучиво во согласност со законот и во јавен интерес. Министерството останува отворено за комуникација со граѓаните, локалните заедници, стручната јавност и граѓанските организации и ќе продолжи да дава конкретни одговори во рамките на своите надлежности – наведува Министерството за енергетика.
