Зајакнувањето на институционалната соработка и унапредувањето на комуникацијата меѓу Собранието и граѓаните беа во фокусот на денешната посета на собранискиот претседател Африм Гаши на Општина Бутел и Канцеларијата на пратениците за контакт со граѓаните.
Како што соопшти собраниската прес-служба, Гаши во Бутел остварил работна средба со градоначалникот Дарко Костовски, на која биле разгледани можностите за продлабочување на институционалната соработка, тековните проекти во општината, како и плановите и приоритетите за наредниот период.
На средбата била нагласена важноста од континуирана координација и комуникација меѓу институциите со цел поефикасна реализација на проектите и иницијативите од интерес на граѓаните.
По посетата на Општината, Гаши, заедно со пратеничката Каролина Насковска, ја посетил и Канцеларијата на пратениците за контакт со граѓаните во Бутел.
– За време на посетата, тој ги охрабри да го искористат максимално овој простор што овозможува директна комуникација меѓу граѓаните и пратениците, и го олеснува решавањето на нивните барања, предлози и загрижености. Истовремено, ја истакна важноста на информирањето на граѓаните за можностите што ги нуди канцеларијата, како и електронската платформа за контакт со граѓаните, како важни механизми за приближување на Собранието до граѓаните – стои во соопштението од Собранието.
Оттаму дополнуваат дека претседателот на Собранието ја потврдил заложбата за зајакнување на транспарентноста и отвореноста на институцијата, како и за создавање услови граѓаните полесно да ги остваруваат своите права и нивните барања да бидат разгледувани преку институционалните механизми.
