– По повод месецот посветен на подигање на свеста за ракот на дојка, попладнево во Општина Кавадарци беше организирана панел-дискусија, наменета за девојки од трите средни училишта.
Панелистки беа докторките Цветанка Ристовска Гинева, Весна Ризова, Гордана Ѓорчева Камчева и фитнес-инструкторката Моника Ристовска.
– Целта е преку вакви настани да создадеме простор во кој младите ќе можат отворено да разговараат за теми, што се важни за нивното здравје, да поставуваат прашања и да добиваат стручни и проверени информации. Имаме четири панелистки од различни области – гинекологија, психијатрија, радиологија и физичка активност, со кои разговараме за женското здравје, превенцијата, менталното здравје, самодовербата и значењето на здравите животни навики – истакна Софија Маркова, службеник за млади при општина Кавадарци.
Особено е важно, рече таа, што ова не е само класично предавање, туку интерактивна дискусија во која девојките имаат можност и анонимно да поставуваат прашања за теми за што можеби се срамат да разговараат.
– Верувам дека едукацијата и превенцијата треба да започнат уште од најрана возраст, а наша обврска е на младите да им обезбедиме поддршка, знаење и сигурен простор за разговор. Мојата порака до сите млади девојки е да не се плашат да поставуваат прашања, да не се срамат да побараат совет и да запомнат дека грижата за сопственото здравје не е луксуз, туку потреба – нагласи Маркова во изјава за медиумите.
