Градоначалникот на Општина Илинден, Александар Георгиевски учествувал на регионалниот форум „Зелена агенда: од национални политики до локални економски можности“, што се одржал во организација на Центарот за климатски промени, со поддршка од Владата на Швајцарија преку програмата „Цивика мобилитас“.
Георгиевски на панел дискусијата на тема „Локални зелени приоритети како основа за инвестиции и економски раст“, ги претставил реализираните проекти и идните приоритети на Општината во областа на енергетската ефикасност, обновливите извори на енергија, управувањето со отпадот и развојот на зелената инфраструктура, со посебен осврт на проектите „Зелена Општина Илинден“ и „Светла Општина Илинден“.
Тој го истакнал значењето на соработката со бизнис-секторот, граѓаните и соседните општини, и нагласил дека зелените инвестиции не претставуваат само вложување во заштитата на животната средина, туку и важен предуслов за одржлив економски развој, намалување на јавните трошоци и подобрување на квалитетот на живот на граѓаните.
– Учеството на овој форум претставува можност за размена на искуства, зајакнување на меѓуопштинската соработка и развивање нови партнерства. Општина Илинден и во наредниот период ќе продолжи со реализација на зелени и одржливи проекти, насочени кон заштита на животната средина, локален економски развој и подобрување на квалитетот на живот на граѓаните, велат од Општината.
