Претседателот на македонското Собрание, Африм Гаши, денеска се сретна со потпретседателот на Владата на Црна Гора, Филип Ивановиќ, при што го поздрави напредокот на Црна Гора во процесот на европската интеграција, истакнувајќи ја важноста на овој процес, како и предизвиците со кои се соочува земјава на нејзиниот пат кон членство во Европската Унија – информираат од Собранието.
Тој ја нагласил важноста на соработката и меѓусебната поддршка, посочувајќи дека двете земји споделуваат заеднички стратешки цели за европска интеграција, стабилност и развој на регионот.
Потпретседателот на Владата на Црна Гора известил дека со македонската Влада е договорено воспоставување на авионската линија помеѓу Скопје и Тиват што може да ги поддржи економските и туристички односи во иднина. Воедно, тој зборувал и за процесот на интеграцијата на Црна Гора во ЕУ кој, како што рекол, може да заврши до 2028 година со полноправно членство во ЕУ. Потенцирал дека Црна Гора ја поддржува земјава во интегративниот процес оти само со целосна интеграција на целиот Западен Балкан во ЕУ ќе се обезбеди мир и развој во регионот.
-На планот на парламентарната дипломатија претставникот од Црна Гора изрази надеж дека наскоро треба да дојде до посета на претседателот на Парламентот на Црна Гора на Македонија, а треба да се иницира и средба на парламентарните групи за соработка помеѓу двете земји – се вели во собранието од собраниската прес-служба.
На крајот на средбата, соговорниците изразиле желба средбите и соработката да се продолжи понатаму во заемна полза на двете страни. Гаши изразил уверување дека оваа средба како и другите средби со претставниците на пријателска Црна Гора ќе придонесат во понатамошно развивање на односите помеѓу двете земји.
