Ескалација на протестите во Албанија: 26 повредени во судирите во Тирана

Дваесет и шест луѓе, меѓу кои полицајци, демонстранти и случајни минувачи, се повредени за време на протестите што се одржаа синоќа во Тирана и се згрижени во Универзитетската болница во Тирана. Студентските протести, кои траат веќе три дена, се одржуваат поради незадоволството од условите на универзитетите, високите трошоци за студирање, недоволната финансиска поддршка и слабите можности за вработување по дипломирањето. За време на немирите биле запалени возила и избиле пожари, додека безбедносните служби се обидувале да ја стават ситуацијата под контрола. Албанскиот премиер, Еди Рама, отфрли каква било можност за поднесување оставка, нагласувајќи дека неговата влада има легитимен мандат добиен на минатогодишните избори. Рама истакна дека, иако е подготвен да разговара за барањата на студентите, уништувањето на имотот и нападите врз институциите се неприфатливи, додавајќи дека насилството на улиците не смее да ја загрози стратешката европска цел на земјата. Според Рама, протестот се оддалечил од првичната цел и повеќе не ги претставува реалните грижи на студентите. Тој обвини дека во последните случувања се вмешани надворешни фактори.