Во Израел се води мртва трка за тоа кој ќе ја формира идната влада. Досегашните, сè уште неофицијални резултати од изборите покажуваат дека блокот на премиерот Бенјамин Нетанјаху има големо водство. По преброени над 60 проценти од гласовите, партијата Ликуд има освоено 55 пратенички места, пред опозицискиот блок на Гази Ајсенкот со 49 мандати. Сепак, овие резултати не се конечни. Арапските партии заедно освоиле 16 мандати, покажуваат податоците на Централната изборна комисија.
Резултатот на двете политички опции е недоволен за мнозинство, за кое се потребни најмалку 61 од вкупно 120 места во Кнесетот. Нетанјаху, обраќајќи се во изборниот штаб на својата партија во Ерусалим, изјави дека Израел има „историска и единствена можност“, заедно со американскиот претседател Доналд Трамп, конечно да ја отстрани иранската закана. Тој ги критикуваше партиите подготвени да соработуваат со арапските партии за евентуално да формираат влада.
Трамп, пак, оцени дека неговата поддршка за Нетанјаху влијаела врз изборниот резултат, посочувајќи дека наместо очекуван убедлив пораз на премиерот, резултатите сега укажуваат на тесна трка. Изборите забележаа и највисока излезност од 1999 година.
