Вреди: Стариот лисец Ахмети од вчера стана ранет играч кој чека политичка егзекуција од поранешниот соработник

Очекувано враќањето на Груби дома ја разбранува и политичката сцена. Главниот противник на ДУИ, владејачката „Вреди“, тврди дека кај интегративците владеело паника поради тоа што Груби знаел премногу и ако проговорел пред органите на прогонот тоа би значело крај за многу нивни функционери.

„Стариот лисец Али Ахмети од вчера, од мајстор на политичкиот занает, стана ранет играч кој чека политичка егзекуција од поранешниот најблизок соработник. Црната кутија на владеењето на ДУИ се стави на располагање на правдата. Вистината неизбежно ќе почне да излегува на површина“, велат од Вреди. Според нив, Груби не бил обичен функционер, туку извршител, координатор и доверлив човек за сите клучни одлуки во изминатите години – од задкулисни договори, преку сомнителни тендери, до политички пазари. Затоа, велат од Вреди, денес не станува збор само за индивидуална одговорност, туку за систем што почнува да се расплетува.