Во рамки на донаторската акција „Заокружи сметка“ организирана од компанијата Веро,
годинава се обезбедени 528.812 денари (околу 8.500 евра) за децата од СОС Детско село.
Традиционално, трета година по ред, Веро ја организира оваа акција во своите маркети
со цел да го поттикне индивидуалното донаторство, но и да обезбеди дополнителна
финансиска поддршка за децата без родители и родителска грижа.
Под мотото „Биди дел од детската радост“, во периодот од 1 декември до 15 јануари сите
потрошувачи во Веро имаа можност да ја „заокружат“ својата сметка на каса со
дополнителен износ по свој избор за хуманитарна цел, односно како донација за СОС
Детско село. На тој начин, потрошувачите добија можност да подарат насмевка за секое
дете и да обезбедат подобра иднина за сите.
Донаторскиот чек во име на Веро и потрошувачите го предаде Милана Петковски,
маркетинг директор на Веро.
„Како општествено одговорна компанија сметаме дека помагањето и поддршката на
ранливите групи во општеството, особено на најранливата категорија, децата без
родителска грижа, треба да биде дел од културата на живеење на секој од нас. Водени од
оваа цел, трета година по ред организираме хуманитарна кампања за поддршка на СОС
Детско село. Особено сум горд што како компанија внесовме еден иновативен концепт за
поттикнување на индивидуалната филантропија, преку кој покажуваме дека позитивните
промени се можни, само треба да сакаме да ги направиме. Токму затоа Веро ќе продолжи
и во иднина, преку различни кампањи и донаторски акции, да овозможува поддршка за
СОС Детско село“, истакна Петковски.
Силвија Брајовиќ од СОС Детско село ги сподели зборовите на основачот и идеолог на
СОС Детско село, Херман Гмајнер, кој вели „Лесно е да чиниш добро кога многумина
помагаат“.
„Овие зборови уште повеќе добиваат на тежина после една ваква благородна акција на
Веро маркетите и нашите граѓани. Од срце благодариме за секоја донација од
многубројните граѓани кои ја препознаваат важноста на нашата мисија – топол дом,
грижа и љубов за секое дете. Голема благодарност и до нашиот стратешки партнер Веро
кој веќе трета година нѐ поддржува преку организирање хуманитарни кампањи во
нивните продажни места. Воедно, изразуваме и благодарност до 22 вработени во Веро,
нашите амбасадори, кои овозможија нашата порака полесно да стигне до голем број
граѓани. Веруваме дека и други компании ќе го следат овој пример и ќе придонесат за
уште повеќе детски радости и насмевки“, рече Брајовиќ.
Годинава кон донацијата за СОС Детско село се приклучи и Киро Сечков, среќниот
добитник на главната премија од новогодишната наградната игра на Веро, кој дел од
средствата за „годишниот шопинг на сметка на Веро“ ги пренамени за дечињата без
родители и родителска грижа.
Хуманитарната акција која го поттикнува индивидуалното донаторство е уште еден доказ
дека индивидуата има голема моќ и можност да дејствува и прави промени во различни
области од општественото живеење.
