– Земјоделците будно да ја следат временската прогноза. Поради најавените минусни температури, да преземат мерки за заштита на младите есенски посеви кои се во фаза на никнување и на новозасадените градинарски култури од површинско замрзнување на почвата, апелираат агрометеоролозите од УХМР.
Се препорачува мулчирање или површинско покривање на почувствителните растенија со заштитна фолија (агротекстил) за да се зачува акумулираната топлина во почвата и да се спречат оштетувања на кореновиот систем од првите ноемвриски мразеви.
-Земјоделските производители треба редовно да ја следат состојбата на своите посеви по дождот и да проверуваат дали има прекумерно задржување вода. Се препорачува одложување на ѓубрењето во периоди на висока влажност, за да се избегне ризикот од испирање и загуба на хранливите материи. Поради зголемената релативна влажност во зоната на растенијата, создадени се поволни услови за појава на растителни болести и штетници, па затоа е неопходна редовна контрола, нагласуваат агрометеоролозите.
Според нив, врнежите се добредојдени, особено за есенските посеви. Оптималните рокови за есенска сеидба се во тек, а дел од житните култури, како пченицата, во некои региони се веќе во фаза на никнување.
-Врнежите во овој период се од исклучително значење, бидејќи обезбедуваат влага која е главен услов за р’тење и правилен развој на семето. Во лозарските региони голем дел од врнежите што паднаа се акумулираат во подлабоките слоеви на почвата, што е одлично за следната вегетативна сезона. Кај овошните култури во овој период од годината е потребно да има доволно влага и на длабочина над два метра. Ова му овозможува на растението да обезбеди резервна зимска влага, поради што дождовите влијаат позитивно. Кај некои доцни овошни сорти, како дуњите, јапонското јаболко и калинката, во тек е бербата на плодовите. Овошките имаат потреба од вода и по бербата, за да се кондиционираат, да презимат без оштетувања од ниски температури и да формираат квалитетни родни пупки за идната година. За постигнување висок и квалитетен принос, почвата мора да има доволно лесно достапна вода во текот на целата вегетација, истакнуваат агрометеоролозите од УХМР.
Додаваат дека е во тек и садењето на одделни градинарски култури, како и собирањето на преостанатите есенски плодови.
