Една недела откако воведе привремена управа, Народната банка ги ублажи ограничувањата во битолската Алта банка. Од денеска стапуваат во сила три нови правила.
Неделниот лимит за подигање готовина и плаќање со картичка се зголемува од 10.000 на 15.000 денари. Во Тетово и Струмица се отвораат шалтери на кои клиентите без картички ќе можат да подигнат до 20.000 денари во две недели, а новите плати, пензии и социјална помош ќе можат да се повлекуваат во целост, доколку доаѓаат од други банки.
Мобилното и електронското банкарство повторно се во функција, но со ограничени можности за корисниците. Засега, клиентите можат да ја проверуваат и следат состојбата на своите сметки, додека останатите банкарски функционалности сè уште не се достапни.
Парите на клиентите остануваат на сметките, а за депозитите до 30.000 евра гарантира Фондот за осигурување на депозити.
За правните лица, според првично објавените ограничувања, и натаму се дозволени внатрешни плаќања кон други сметки во истата банка, но не и префрлање средства надвор од банката преку домашните платни системи или подигање готовина од нејзините банкомати и шалтери.
Привремено се ограничени и плаќањата кон странство за физичките и правните лица, додека приливните плаќања од странство продолжуваат да се реализираат преку СЕПА и кореспондентското банкарство.
Клиентите кои имаат кредити во банката и понатаму треба редовно да ги подмируваат ратите.
