До 20 ноември студентите можат да аплицираат за студентска стипендија за академската 2026/2027 година. Пријавувањето на конкурсот што го објави МОН е исклучиво електронско, преку порталот e-uslugi.mon.gov.mk.
Вкупниот број стипендии останува непроменет во однос на лани и изнесува 3.000, но МОН годинава воведе нов модел на стипендирање, со нови категории и поинаква распределба на средствата.
„Промената не е во намалување на поддршката, туку во нејзино подобро насочување и пошироко препознавање на потребите и потенцијалите на студентите. Се воведува значајно унапредување на досегашниот модел на студентско стипендирање. Новиот модел носи поинаков пристап во распределбата на државната поддршка – пристап кој истовремено ја препознава социјалната ранливост, го вреднува академскиот успех и го поттикнува образованието на кадар во области од стратешко значење за државата“, соопшти МОН.
Во категоријата од 1.200 стипендии за социјална поддршка, првпат се воведуваат посебни стипендии за студенти со попреченост и студенти со ретки болести, со по 50 стипендии за секоја од овие категории.
Се воведува и нова категорија од 1.050 стратешки стипендии, наменети за студенти кои студираат во области од особено значење за идниот развој на државата. Станува збор за студиските програми по математика, физика, хемија, земјоделство, шумарство, наставна биологија и рударство.
Дополнително, се воведуваат и 750 стипендии за студенти кои постигнуваат висок академски успех, односно имаат просечен успех од најмалку 8,50 и континуирано ги исполнуваат академските обврски.
За стратешките стипендии месечниот износ е 18.000 денари, додека за социјалните стипендии и стипендиите за висок академски успех изнесува 6.050 денари.
