Расте бројот на заболени од грип во државата. Само последната недела регистрирани се нови 1053 случаи, што е за 3,2 пати повеќе од претходната недела, покажува последниот извештај на Институтот за јавно здавје. Иако вирусот е со среден интензитет, сепак состојбата не е алармантна, ако се земат во предвид бројките од истиот период минатата сезона. Најголем број на заболени има во Скопје, Дебар, Куманово. Матичните лекари потенцираат дека кон крајот на месецот и во февруари, кога ќе стартува и школската година грипот ќе го достигне својот пик.
„Малаксаност, главоболка, болка во грло, кашлица, покачена температура. Тоа се најчесто симптомите на коишто се жалат пациентите„ изјави д-р Валентина Митрова.
И во Штип, бројот на заболени од грип е во пораст. Во просек секој ден се дијагностицираат по три нови случаи. Само последната недела има 22 новозаболени. Лекарите препорачуваат лицата со симптоми на грип да не се движат во групи и на своја рака да не земат терапија.
„Никако антибиотици на своја рака без препорака од лекар. Оние што имат хронични заболувања како дијабет, покачен крвен притисок, астма задолжително да се јават кај матичен, бидејќи и те како грипот може да биде сериозно заболување„ изјави д-р Валентина Митрова.
Во однос на возраста, 633 заболени се на возраст од 15 до 64 години, а 323 се деца на возраст до 14 години.
