Отворена е телефонска линија 078/378-754 за психолошка поддршка на повредените во пожарот во дискотеката „Пулс“ во Кочани, како и за семејствата на загинатите. Во трагедијата која се случи во дискотеката „Пулс“ загинаа 59 лица на возраст од 14 до 25 години, претежно од Кочани и околината.
Во моментот, 84 лица се хоспитализирани во Македонија, додека 51 пациент ќе бидат транспортирани на лекување во странство, што значи вкупно 135 повредени. Меѓу хоспитализираните се и седум малолетници.
Министерството за здравство информира дека во координација со Психијатриската болница и Клиниката за психијатрија се формираат мобилни тимови составени од психијатри и психолози, кои ќе обезбедуваат психолошка поддршка за семејствата и пациентите.
„Како дел од оваа иницијатива, ќе биде ангажиран мобилен тим од двајца лекари и еден психолог во Кочани, со цел да се обезбеди навремена и соодветна психолошка помош на граѓаните“, соопшти Министерството за здравство.
Министерот Таравари апелира до сите кои биле во дискотеката во моментот на пожарот да се обратат кај своите матични лекари за консултација и евентуално понатамошно лекување.
