Оправдани се стравувањата дека нова епидемија од мали сипаници ни тропа на врата. Лекарите препупредуваат дека опфатот со вакцинација кој го имаме во моментов е многу низок. Велат ако не се достигнат потребните 95 проценти многу лесно може она што се случува во соседствто да се прелее и кај нас. Вакцинацијата е најдобрата заштита посебно за најмалите.
- „Епидемијата очекувано и предвидливо е да се појави и кај нас поради нискиот опфат на самата вакцинација со вакцината за морбили. Сакам да напомнам дека ние поради вкупниот опфат кој што изнесува 62 проценти а треба да изнесува за да имаме добар бедем и заштита да не настане епидемија 95 проценти тоа е многу малку за да стигнеме до конечна заштита и да ја избегнеме сериозната опасност од појава на епидемија“ вели во изјава за Алфа др. Соња Ралева-спец. по општа медицина ЈЗУ ,, Бит Пазар’’.
Болеста многу брзо и лесно се шири затоа лекарите апелираат до родителите кои одбиваат да ги вакцинираат своите деца да не стравуваат за квалитетот на вакцините. Имунизацијата со МРП е безбедна и се користи во последните 50 години. Дава повисок имунитет отколку прележана болест.
- „Сведоци сме на состојби и интензивни опаѓања на на статистиките на вакцинација во последните неколку децении. Посебно од Ковид епидемијата навака, поради преполни социјални мрежи од неточни информации и дезинформации кои што ги збунуваат родителите“ вели Др. Соња Ралева- спец, по општа медицина.
– Лекарите додаваат да не се доведеме во состојба да се соочиме со болести кои предизвикуваат сериозни компликации по здравјето на нашите деца. Алармот се запали откако бројот на заразени од морбили рапидно расте во Бугарија и Косово. Инаку, малите сипаници се опасна болест која може да заврши и со смртни последици. Под најголем ризик се децата помали од 5 години, луѓето со слаб имунитет, трудниците, и невакцинираните. Болеста започнува со појава на висока телесна температура која се качува и над 40 степени, главоболка, треска, секрет од нос, и црвенило во очи. Последната епидемија на морбили во Македонија беше во 2019 година со вкупно 2177 случаи на заболени, од кои 4 завршија со смртен исход.
