Околу 15 специјалисти од Белград и Чешка пристигнаа во државава за да помогнат во лекувањето на повредените во катастрофалниот пожар што се случи во дискотеката во Кочани. Според последните официјални информации, загинаа 59 лица, а 155 се повредени. Се очекува и пристигнување на специјалисти од Израел.
Министерот за здравство, Арбен Таравари, денеска изјави дека специјалистите ќе бидат распоредени по клиниките каде што има потреба.
Таравари појасни дека дел од пациентите се транспортирани надвор од државата не затоа што немаме центар за изгореници, туку затоа што се работи за голем број на пациенти.
„ И да одите во поголеми држави, нема центри за изгореници. Гледате дека сите држави прифаќаат од двајца до пет пациенти, не повеќе. Кај нас се случи шок, изгореници на повеќе од 100 лица кои треба да се третираат. Нормално е дека немаме капацитети да ги третираме на најдобар можен начин. Овие пациенти, поради компликациите што се јавуваат од изгорениците, а сите се од втор или трет степен, веќе се изложени на опасност од инфекции. Целта ни беше да се третираат што подобро, а ние да бидеме подготвени за евентуални пациенти кои се латентни,“ изјави Таравари.
Директорот на Фондот за здравствено осигурување (ФЗО), Сашо Клековски, оцени дека македонскиот здравствен систем одлично се снашол во целата ситуација и дека, и да имавме центар за изгореници, не би можело да им се пружи соодветна грижа, затоа што пациенти со вакви изгореници бараат посебен третман.
„Со целата критика на македонското здравство, вчера над 140 повредени беа прифатени во многу краток период. Зборуваме за пациенти со изгореници од втор и трет степен на повеќе од 10, 20, 30 проценти од површината на телото. Морам да кажам дека првата фаза на згрижување на пациентите е завршена, никој не остана незгрижен. И да имавме центар за изгореници, ќе имавме бокси за четири-пет пациенти,“ истакна Клековски.
