🎥 Над 105 милиони евра од Фондот завршиле кај двете најголеми приватни клиники за кардиолошки интервенции

Не се знае колку време ќе и треба на Интерната комисија да ја направи прелиминарната анализа на кардиолошките и кардиоваскуларните интервенции во здравствените установи во државата. По наводите на доктор Кедев, Комисијата треба да истражи дали во приватните болници се правеле медицински неоправдани операции на срце кај пациенти, само за профит. Првиот човек на Фондот за здравство Сашо Клековски вели дека утврдувањето на методологијата ќе трае две недели. Токму затоа биле вклучени и правници од Фондот, за да се утврди колкав ќе биде обемот на контрола. Вели многу ќе биде полесна нивната работа ако има претставки од граѓаните за некој конкретен случај. Сепак, експертите ќе утврдат дали оваа појава постоела во голем обем. Апелира прво да се истражуваат случаите кајшто имало покомплицирани и поризични интервенции, кои повеќе го чинеле Фондот за здравство.

Клековски вели дека сите поголеми здравствени установи се контролираат еднаш годишно, а по поднесени претставки и почесто. За стентирањата во приватните клиники, Фондот немал податоци, бидејќи финансиски не поддржува такви интервенции.

Наодите од анализата на интерната комисија треба во најскоро време да бидат доставени до стручната комисија составена од странски експерти. Во меѓувреме, Министерството за здравство побара од државните болници да достават податоци за периодот од  2022 – 2025 година за сите извршени интервентни кардиолошки процедури, како што се  стентирања, васкуларни ангиографии и кардиохируршки операции.

Од Фондот информираат дека за годинава се издвоени околу 40 милиони евра за кардио и кардиохируршки приватни и јавни установи. Заклучно со другите болници во внатрешноста, бууџетот достигнува и до 45 милиони евра. Од овие пари, под 20 милиони евра одат во касите на двете приватни болници: Жан Митрев и Систина. Фондот работи исклучиво со еднакви цени за сите установи. Клековски нагласи дека издвоениот буџет не може да се зголемува, ако во приватните болници, на пример има зголемена потреба од вакви интервенции.