Министерот за надворешни работи, Тимчо Муцунски, информираше дека 51 повреден пациент од пожарот во Кочани бил испратен на лекување во странство, благодарение на координираните напори на кризниот штаб. Во следните денови, дополнително 20 лица ќе бидат транспортирани во болници во Австрија, Словенија, Хрватска, Норвешка и Унгарија.
Муцунски истакна дека лично контактирал со министрите за надворешни работи на Грција, Бугарија, Србија, Хрватска, Турција, Црна Гора, Холандија, Косово, Малта, Унгарија, Израел, Албанија, БиХ и Словенија, како и со Ричард Гренел, претставник на администрацијата на САД. Претседателот на Владата, Христијан Мицкоски, исто така се консултирал со светски државници, вклучително и со генералниот секретар на НАТО, Марк Руте.
„Во сите овие разговори, нашите пријатели изразија сочувство и понудија помош, вклучувајќи материјално-технички средства, човечки ресурси и медицинска нега“, рече Муцунски.
По интензивните напори, првите пациенти беа транспортирани во странство за само 12 часа, а во моментов, 51 пациент се наоѓа во странски болници: девет во Турција, 14 во Бугарија, четворица во Грција, 17 во Србија, четворица во Литванија, и два пациенти во Унгарија.
Министерот најави дека денеска ќе бидат испратени нови пациенти: шест во Австрија, четири во Словенија, четири во Хрватска, и уште четворица во Норвешка и Унгарија. Тој додаде дека медицински тимови од Чешка, Израел и Белград пристигнуваат за да помогнат на местото.
„Во секоја земја каде што се испратени пациентите, има одредени контакт лица на МНРРТ, достапни 24/7 за родителите и пациентите“, рече Муцунски.
Министерството ќе понуди финансиска поддршка за патни трошоци на семејствата на пациентите, а за помош се активирани и механизми за цивилна заштита од ЕУ.
„Изразувам искрена благодарност до сите земји кои одговорија на нашиот апел. Солидарноста во вакви моменти е потврда на пријателството и сојузништвото што нашата држава го има со многу земји“, додаде Муцунски.
Пожарот во дискотеката „Пулс“ во Кочани, кој предизвика големи трагедии, резултираше со смртта на 59 млади луѓе, а повеќе од 150 лица се повредени, кои сега добиваат помош во земјата и странство.
