Премиерот упати искрена благодарност до лекарите и медицинските тимови за нивните натчовечки напори во спасувањето човечки животи, особено во првите моменти од ужасната трагедија и во процесот на транспорт. Тој апелираше до сите кои биле во близина на страшниот настан да се јават на доктор за консултација, без разлика дали чувствуваат било какви проблеми или не.
„Неопходно е да се преземат одредени мерки, без пркосење или негирање. Мораме да се справиме со ситуацијата доколку не сакаме да имаме последици во иднина. Апелирам уште еднаш, како што реков вчера, сите кои се наоѓале во близина на трагедијата да побараат консултација од доктор, без разлика дали имаат симптоми или не“, истакна премиерот Христијан Мицкоски.
Тој ја повтори одлучноста на Владата да продолжи да презема сите неопходни мерки за спасување човечки животи.
„Голем број пациенти веќе се префрлени во странство – повеќе од 70-80 лица. Денеска, министерот за надворешни работи и министерот за здравство се наоѓаат во Солун, а потоа ќе продолжат за Софија за да ги посетат пациентите кои се згрижени таму. За час и половина ќе се одржи седница на Владата, на која ќе ја потврдиме одлуката да ги покриеме трошоците за двајца членови од семејството за да им овозможиме превоз и сместување во местата каде што се згрижени пациентите“, додаде премиерот.
Мицкоски изрази благодарност за поддршката од странство, нагласувајќи дека помошта стигнува од сите страни, а државата реагирала во рекордно време и презела сите потребни мерки и протоколи, како никогаш досега.
