Министерот за животна средина и просторно планирање Муамет Хоџа денеска учествуваше на националниот дијалог „Забрзување на климатската акција: Национален дијалог на патот кон COP31“, организиран од МЖСПП и Програмата за развој на Обединетите нации (УНДП).
Како што соопштуваат од Министерството, во рамки на настанот се одржала панел-дискусија во која покрај министерот Хоџа учествувале и претседателката на Македонија, Гордана Сиљановска-Давкова, министерката за енергетика, рударство и минерални суровини, Сања Божиновска, постојаниот претставник на УНДП, Армен Григорјан, и Даме Димитровски, советник на претседателот на Владата за животна средина и клима. На настанот присуствувале и претставници на институциите и експерти од областа на климатските промени.
Во обраќањето Хоџа истакнал дека климатските обврски мора да се преточат во конкретни мерки и мерливи резултати. Тој ги посочил унапредувањето на националното климатско планирање, подготовката на Законот за климатска акција и јакнењето на системот за следење и известување како важни чекори кон поодговорна и поефикасна климатска политика.
Министерот Хоџа нагласи дека за забрзување на климатската акција се потребни силни институции, координација, инвестиции и соодветна меѓународна поддршка.
Климатската политика, истакнал тој, е важна и за зелената транзиција, енергетската сигурност и одржливиот економски развој.
Националниот дијалог е дел од подготовките на земјата за Конференцијата на ОН за климатски промени COP31, која ќе се одржи во Анталија, Турција, од 9 до 20 ноември 2026 година.
