Штипската Клиничка болница прави проценка дали има капацитет да ги прими повредените од пожарот во дискотеката „Пулс“ во Кочани, кои ќе имаат потреба од дополнителен третман. По отпуштањето на пациентите од болниците во земјата и странство, заврши првата фаза во лекувањето. Сега се проценува дали пациентите ќе можат да бидат сместени во болничките капацитети за втора и трета фаза на лекување.
Изјава – д-р Владко Захариев, директор на Клиничка болница-Штип:
„Пациентите се уште се во активна прва фаза, бидејќи на нив се уште се изведуваат хируршки интервенции. По отпуштањето дома, болницата ќе преземе некои преврски за полесни пациенти, а ќе се направи и увид во одделот за Физикална терапија. Во иднина, во трета фаза тие пациенти ќе добиваат физикален третман“, изјави д-р Владко Захариев, директор на Клиничка болница-Штип.
Доколку се успее со преадаптацијата на просторот, дел од пациентите ќе бидат сместени на оделот за Физикална терапија. Лекари од Англија и преставници од Министерството за здравство, денеска извршија увид и утврдија дека треба да се направи соодветна преадаптација на просторот, како што е пренаменување на трикреветни соби во еднокреветни. Медицинскиот тим ќе одлучи кои пациенти ќе бидат хоспитализирани, а кои ќе бидат лекувани амбулантски.
„Тоа е втора фаза, активен третман на преврски. Проценката за третманот ќе ја правиме со нашите лекари, пластичните хирурзи и со консултација со лекарите од Скопје, и така ќе одлучиме кои пациенти ќе бидат хоспитализирани и како ќе се лекуваат“, изјави д-р Владко Захариев, директор на КБ-Штип.
Захариев потенцираше дека се уште е неизвестно колку пациенти ќе може да прими штипската Клиничка болница.
