Директорот на Градската општа болница „8 Септември“ во Скопје, доктор Синиша Стојаноски, ги соопшти новите информации за бројот на хоспитализирани пациенти.
„Неколку тимови од реномирани странски медицински центри, специјализирани за ваков тип на повреди, меѓу кои и од ВМА во Белград, болницата во Израел и Чешка, веќе работат со тимовите во ГОВ „8 Септември“ на санирање на повредите на пациентите кои не се критични и кои се подготвуваат за следната фаза на лекување. Во моментов во Македонија има вкупно 64 пациенти во јавните здравствени установи, 8 се во Систина и 5 во Жан Митрев. Вкупно хоспитализирани се 77 лица од повредените. 101 пациент е трансфериран,“ истакна тој.
Стојаноски нагласи дека добрата вест е што последните трансфери не се во насока на критични пациенти кои се интубирани, туку се прави тријажа на пациентите според степенот и опсегот на изгореници.
„Пациентите со најголем процент и највисок степен на изгореници се трансферираат во специјализирани референтни центри за третман на вакви случаи,“ рече тој.
