Упати, рецепти, медицински извештаи, резултати и дијагнози се што е на хратија наскоро ќе замине во историјата. Сите здравствени податоци кои досега беа на документи ќе се чуваат на исто место, односно, дигитално и централизирано – ова се предвидува со новите законски измени за евиденциите на здравството каде секој пациент во Македонија ќе има електронски картон. Тоа значи дека во секој момент од било каде, дали преку компјутер или мобилен, секој кој има потреба да си види резултати од анализи или да си ја види терапијата рецепти ќе може тоа да го направи со својот матичен број или здравствена електронска книшка. Лекарите исто така ќе имаат поголем увид во историјата на пациентот. Со оваа реформа здравствените власти очекуваат побрз пристап до информации, помалку административни процедури и поефикасна здравствена услуга.
“Нашата цел е здравствените податоци да се водат модерно, безбедно и поврзано, со што ќе се подобри и квалитетот на здравствените услуги за пациентите. Со ова законско решение, кое деновиве ќе биде поставено на ЕНЕР, се надминуваат досегашните ограничувања во системот на здравствени евиденции и се овозможува нивно целосно електронско водење преку Националниот систем за електронски евиденции во здравството „Мој Термин“, појасни Алиу.
И додека здравството полека но сигурно се дигитализира, се прават и други покрупни чекори за подобри и поедноствни здравствени услуги. Со спојувањето на државната кардиологија и кардиохирургија се очекува поголем број интервенции и помалку административни пречки за пациентите.
“Бидејќи овие две клиники се и физички во една зграда и процедурите сегде во светот се влегуваш и излегуваш, а не мора да шеташ од една во друга клиника, за пациенти коишто имаат ваков тип на здравствени проблеми. Затоа почнавме од овие две клиники, но нема да завршиме тука. Да видиме прво кои ќе бидат предизвиците на спојувањето на двете клиники и ова ни е според нас најлесно спојување на двете клиники, затоа почнуваме од кај нив“, изјави Алиу.
Во однос, на дефицитот на анестезиолози на оваа Клиника министерот вели дека се преговара со повеќе специјалисти од странство да доаѓаат тука. Но тоа според него не е трајно решение. Како дополнителна мерка, се подготвува план специјализацијата по анестезија и реанимација да се скрати – од сегашните шест на четири години, со цел побрзо да се создаде нов кадар.
