Овчи сипаници – најчесто регистрирано акутно заболување во месец декември минатата година се овчите сипаници или познати како варицела. Вкупно има 1.025 лица, што стои во месечниот билтен на Институтот за јавно здравје.
„Овие бројки се сериозен показател за состојбата со заразните заболувања во земјата. Порастот на овчите сипаници, како и зголемената бројка на сексуално и крвно преносливи инфекции, бараат засилени превентивни мерки“, велат од ИЈЗ.
Во споредба со истиот период минатата година, бројот на пријавени случаи пораснал за 4,6%, а во однос на десетгодишниот просек, порастот изнесува 8%.
„Овој тренд укажува на потребата од редовна вакцинација и зголемена јавна свест за рано препознавање и превенција“, одлучни се од Институтот.
Во месец декември евидентирани се и 6 случаи на Ковид-19. Но, ова не е реална бројка бидејќи граѓаните не се тестираат и често сами се лекуваат. Забележани се 7 случаи со сифилис, 6 со вирусен хепатит Б, 5 со вирусен хепатит Ц и 4 со инфекција со хламидија.
Од ретките заболувања има 4 случаи на голема кашлица и 2 на заразни заушки.
Еден случај на СИДА завршил со смрт.
