Клиниката за гастроентерохепатологија доби значајна донација од уметнички дела, со што се збогати и разубави болничкиот простор. Станува збор за околу 30 дела, донирани од реномирани, но и млади уметници, кои преку својот креативен израз дадоа придонес за подобрување на условите во установата.
Донацијата има за цел да создаде попријатна и поинспиративна атмосфера за пациентите и медицинскиот персонал, што е особено важно во процесот на лекување и престој во болница. Уметничките дела веќе се поставуваат во просториите на Клиниката, каде ќе внесат топлина, боја и позитивна енергија.
Меѓу донаторите се: Данчо Ордев, Гоце Божурски, Игор Мишев, Томе Мишев, Дејан Иванов Маргуш, Стефан Хаџи-Николов, Боро Арсовски, Марјан Стојаноски, м-р Емилија Тоциновска, д-р Стојче Тоциновски, Горан Боев, Павле Кузманоски, Невзат Кица, Решат Амети, Владимир Темков, Бурхан Ахмети, Здружението за уметност и култура „СИЛИНДАРТ“ од Гостивар, Акиме Насуфи Реџепи, Дренуша Пашоли, Ванеса Ода, Лида Шарафатманд, Владимир Лазоски, Тасим Кадрија, Ардиан Кадрија, Имран Зимери, Џоко Антониев и Дејан Божиновски Коска.
На приморедавањето на уметничките дела, директорката на Универзитетската клиника за гастроентерохепатологија, проф. д-р Мери Трајковска рече дека замолиле што поголем број уметници да им излезат во пресрет, за да го оплеменат просторот на Клиниката, бидејќи сметаат дека уметноста и хуманоста, како и медицината се на една иста линија. Посочи дека голем број уметници донирале свои дела.
Оргазниаторот на настанот Сабри Азири, им се заблагодари на сите учесници и поддржувачи, истакнувајќи дека ваквите иницијативи имаат големо значење за поттикнување на хуманоста и зајакнување на заедништвото во општеството.
