Министерот за здравство, Арбен Таравари, денеска изјави дека ќе се побара одговорност доколку се утврдат пропусти во постапувањето во случајот со смртта на 59-годишниот Тони Ангеловски, кој почина со пукната аорта додека чекал хируршка интервенција на Клиниката за кардиохирургија.
Таравари потврди дека засега сѐ уште го нема добиено официјалниот извештај од Државниот здравствен и санитарен инспекторат, но најави следни чекори:
„Ќе го видам извештајот. Ќе треба да има веднаш и стручна комисија. Според моите информации, едната сала работела. Но, дајте ми време да го видам извештајот,“ изјави министерот.
Според досегашните информации, за ваков тип итна интервенција во земјава постојат три соодветно опремени сали – една државна и две во приватни болници. Сепак, семејството на починатиот тврди дека пациентот бил препратен од државната клиника поради недостапност на сала, по што во приватна болница им биле побарани неколку илјади евра за операција – средства кои тие не можеле да ги обезбедат. Како резултат на тоа, пациентот бил вратен назад во државната клиника.
Министерот потенцираше дека и приватните установи ќе сносат одговорност доколку се утврди дека не обезбедиле соодветен капацитет:
„Ако немале сала, и тие треба да понесат одговорност,“ додаде Таравари.
Од семејството обвинуваат дека им било речено оти на Клиниката нема слободни сали, а во приватните болници квотите се исполнети до јуни. Иако пациентот бил примен за стабилизација, не била извршена интервенцијата поради недостапност на неопходна опрема.
Од Клиниката за кардиохирургија пак велат дека пациентот бил згрижен и стабилизиран со соодветна терапија. Лекарскиот тим проценил дека поради сложеноста на случајот, шансите за преживување при хируршки третман биле „екстремно мали“, што било соопштено на семејството. Дополнително, посочија дека втората оперативна сала е надвор од функција повеќе од еден месец, поради поставување на нов апарат и адаптација на просторот.
Пациентот бил препорачан за понатамошно лекување во две приватни установи или во странство.
