Од вкупно 193 повредени во трагедијата во Кочани, 57 пациенти и понатаму се на болничко лекување – девет во здравствени установи во Скопје и 48 во странство, информираше министерот за здравство Арбен Таравари.
Според информациите, двајца пациенти се во критична состојба, додека другите се со стабилна здравствена состојба. Дел од нив се во фаза на рехабилитација, а некои очекуваат оперативни зафати.
Во Скопје, двајца пациенти се хоспитализирани на Клиниката за пластична хирургија, четворица во болницата „Свети Наум Охридски“, еден во ГОБ „8 Септември“, а останатите се сместени во приватни здравствени установи.
Министерот посочи дека 48 пациенти сè уште се лекуваат во странство, но еден од нив денеска се враќа од Унгарија, со што бројката ќе се намали на 47.
Како позитивен пример на опоравување, Таравари ја истакна состојбата на пациентка која двапати била реанимирана, а денеска на Клиниката за пластична хирургија покажува значителни знаци на подобрување.
„Тоа е добар пример на пациент кој беше во многу тешка состојба“, додаде министерот.
