Фирмата што ја водела дискотеката „Пулс“, основана на 29 мај 2020 година, имала блокирана банкарска сметка. Александар Карадакоски, кој е директор на фирмата „ММММ кафе доел Кочани“, која ја управувала со дискотеката, е приведен. Според последните податоци, фирмата имала долг од околу 3.000 евра во 2023 година.
МВР, во соработка со Јавното обвинителство, до сега осомничило повеќе од 20 лица во врска со трагедијата во Кочани. Од нив, 15 се приведени во полициска станица, а некои од осомничените се починати или се во болница. Министрот за внатрешни работи, Панче Тошковски, информираше дека четири осомничени лица се во болница, меѓу кои двајца членови на бендот, син на сопственикот на дискотеката и управител на правното лице.
„Дел од приведените лица кои се во полициска станица имаат директна вина според досега собраните докази. Приведено е и лице за кое имаме сомневање дека е организатор на настанот и дека има директна одговорност“, изјави Тошковски.
Приведени се и поранешен државен секретар на Министерството за економија, раководител на сектор во Министерството за економија, поранешен директор на Дирекцијата за заштита и спасување, како и тројца вработени во Дирекцијата.
