Набавка на нови софистицирани апарати за речиси сите болнички одделенија, специјалистички екипириња на лекарските тимови, како и трајни вработувања на здравствен и помошно-технички кадар, се само дел од амбициозните планови за тековнава година на менаџментот на прилепската Општа болница со проширена дејност. Наследениот хаос бара брза и точна „дијагноза“ на нашето заболено здравство, а следствено на тоа и соодветна „терапија“, вели првиот човек на прилепската болница.
„Скоро во сите одделенија, значи ќе имаме нова опрема. Очекуваме да имаме нов дигитален рентген, нов столб за анестезија, апарати за ЕЕГ, ЕМГ, ќе имаме новини и на Очното одделение, ќе имаме промена на светлата во салите на Хирургија, на Гинекологија, а ќе разговараме со Министерството да се набави Лапараскоп и за Гинеколошкото одделение за и таму да се почне со таков вид на интервенции“, – вели д-р Кире Јоноски, директор на прилепската Општа болница „Борка Талески“.
За да се ублажи пак, се’ позагрижувачкиот недостиг од лекари-специјалисти, планот за годинава е најпрвин трајно да се вработат лекарите кои сега работат договорно, по што ќе се стекнат со правото да бидат испратени и на одредени специјализации. Но, за среќа, сега имало и доктори, кои веќе биле при крај со своите специјализации и тие за скоро време се враќаат во болницата, уверува Јоноски.
„На сите одделенија треба да се вратат по еден-двајца доктори. На Гинекологија, моментално се враќа една докторка, на Ортопедија треба да се вратат двајца доктори од специјализација, на Хирургија двајца доктори..И плус, во најскоро време треба да имаме девет приватни специјализанти. Некои се во завршни години, а некои се во средина на специјализацијата и затоа очекуваме тој процес да заврши во најкраток рок“, – посочува д-р Јоноски.
Според Министерот Таравари пак, за годинава, во оваа здравствена установа не се предвидени некакви градежни реконструктивни зафати, бидејќи како што вели, состојбата и не била толку лоша во споредба со некои други болници во државава од тој ранг. Инаку, прилепската Општа болница со проширена дејност опслужува околу 120.000 пациенти од неколку соседни општини.
