Со имплантација на современа биолошка валвула – докторите од Жан Митрев и го продолжија животот на 74 годишна пациентка која била во тешка општа здравствена состојба, со нарушена функција на бубрезите и поставена на апарат за дијализа. Овој мини-инвазивен метод на замена на протеза на митрална валвула е реткост во светски рамки, а во Македонија оваа операција беше изведена за прв пат во Клиниката Жан Митрев. Првиот човек на клиниката вели дека благодарение на тимот кардиохирурзи и интервентни кардиолози, имплантација завршила успешно.
„Овие навидум невозможни мисии со кои се продолжува животот на пациентите со години и декади, кај нас, во Клиника Жан Митрев стануваат возможни и се почести со што ги поместуваме границите на кардиохирургијата и во светски рамки. Тимот на Клиника Жан Митрев 25 години поставува нови стандарди во целосната здравствена нега и изнаоѓање начини како да помогне на што повеќе пациенти. Со современата апаратура, со примена на напредна технологија создаваме животни можности за нашите пациенти и ја оправдуваме вистинската функцијата на медицината“, истакна д-р Митрев.
Протезата на митралната валвула е поставена преку врвот на срцето во митралната позиција, без пациентката да биде класично оперирана, објаснуваат кардиолозите.
Овој зафат е финансиски покриен од Фондот за здравствено осигурување на Македонија.
