Претседателот на Собранието, Африм Гаши и в.д. претседателот на Управниот суд Бурим Сејдини го потпишаа Меморандумот за соработка за дигитално поврзување на Собранието и Управниот суд.
Како што информираат од собрајниската прес-служба, овој Меморандум е потпишан согласно Планот за дигитално поврзување на Управниот суд со јавните органи, Вишиот управен суд и правните и физичките лица преку соодветна софтверската платформа.
Целта на Меморандумот, како што се наведува во соопштението, е да се воспостави рамка за меѓусебна соработка за дигиталното поврзување (софтверската платформа за дигитализација ЕПУС) при извршувањето на утврдените надлежности на институциите.
Дигиталното поврзување и размена на податоците меѓу Собранието и Управниот суд се воспоставува и спроведува согласно важечките прописи – Законот за управни спорови, Законот за општата управна постапка, Судскиот Деловник, Законот за судови, Законот за електронско управување и користење на услуги, Законот за заштита на личните податоци и согласно надлежностите на Собранието и Управниот суд, како страни потписнички на овој меморандум.
Меморандумот ги опфаќа следните процеси: поднесување на тужба; покана за одговор на тужба; достава на одговор на тужба и списи; одговор на одговор на тужба; достава на покани; достава на одлука; достава на жалба; одговор на жалба; достава на одговор по жалба со списи; одговор на одговор на жалба; достава на жалба до Виш управен суд; достава на второстепена одлука; достава на второстепена одлука до странките; достава на додатни списи за предметот и достава на останати акти за предметот.
-Сите овие процеси дигиталното поврзување на Собранието и Управниот суд ќе ги забрза, олесни и ќе придонесе за поефикасно работење на институциите од една страна и поефикасно остварување на правата на физичките и правните лица утврдени со закон. Во спроведувањето на овој Меморандум страните потписнички ќе ги применуваат највисоките стандарди за безбедност согласно националното законодавство и ќе ја почитуваат доверливоста на податоците и информациите кои се предмет на размена – се вели во соопштението од Собрание.
Од Собрание посочуваат дека Меморандумот ќе биде предмет на постојана заедничка анализа, како и на евентуална дополнителна измена согласно потребите на страните потписнички, со цел унапредување на соработката.
