Ескалација на протестите во Тирана – полицијата употреби гумени куршуми, над 1.000 уапсени

Албанија се соочува со петти ден масовни протести, на кои демонстрантите бараат оставка од премиерот Еди Рама. Полицијата употребила и гумени куршуми за да ги растера учесниците во демонстрациите, а неколку демонстранти и двајца новинари биле погодени од проектилите.

Шефот на албанската полиција, Скендер Хита, не ја негирал употребата на гумени куршуми, но посочил дека сите средства биле употребени во ограничен обем. Во меѓувреме, седум полицајци се суспендирани и се соочуваат со дисциплински постапки поради сомневања за пречекорување на овластувањата и непропорционална употреба на сила.

Според полициските податоци, досега се уапсени 1.067 лица, а против 388 е поведена кривична постапка. Во судирите има десетици повредени полицајци и демонстранти.

Протестите се поттикнати од обвинувањата за корупција во владата, недостигот од работни места и незадоволството од состојбите во образованието. Во последните денови демонстрациите ескалираа, со запалени владини објекти и банки, фрлање камења кон полицијата, како и употреба на солзавец и водени топови од страна на безбедносните сили.

Немирите претставуваат сериозен политички предизвик за Рама, кој минатата година освои четврти последователен мандат. Владата е под притисок и поради повеќе корупциски скандали, кои дополнително ги усложнуваат напорите на Албанија за членство во Европската Унија.

Дополнителен извор на незадоволство е луксузниот туристички комплекс на албанското крајбрежје, поддржан од Џаред Кушнер, зет на американскиот претседател Доналд Трамп. Локални жители тврдат дека земјиштето за проектот било незаконски продадено. „Ројтерс“ објави и дека лицето што го продало земјиштето било барано од обвинителството под сомнение за трговија со дрога, што неговиот адвокат го негирал.

Рама ги отфрла обвинувањата за незаконско постапување и порача дека нема да поднесе оставка. Тој истакна дека владата го почитува правото на студентите на протест, но нагласи дека негов приоритет останува развојот на земјата и нејзиното членство во Европската Унија, за кое владата си поставила цел до 2030 година.