Со спортски натпревари и симболично засадување дрво, денеска во Делчево заврши одбележувањето на Денот на европската соработка и 36-годишнината од програмата Interreg.
Вториот ден од одбележувањето како што информираше градоначалникот на Делчево, Иван Гоцевски беше посветен на спортот, дружењето и промовирањето на прекуграничната соработка, како можност за поврзување на локалните заедници и создавање нови содржини за граѓаните, особено за младите.
-Во рамките на денешните активности беше засадено симболично дрво, како знак на пријателството, партнерството и заедничката посветеност кон европската соработка. Активноста беше поврзана со проектот за изградба на скејт-паркот во Делчево, кој се реализира со финансиска поддршка од програмата Interreg IPА, истакна Гоцевски.
На настанот присуствуваше и градоначалникот на Општина Пехчево, Александар Китaнски, кој ја истакна важноста на прекуграничната соработка и можностите што ги отвораат европските програми за развој на општините.
Одбележувањето во Делчево беше можност да се потенцираат резултатите од долгогодишното партнерство меѓу Македонија и Република Бугарија, преку кое се реализирани бројни проекти во областа на инфраструктурата, економскиот развој, туризмот, спортот и подобрувањето на квалитетот на животот.
Со денешните спортски активности и симболичното засадување дрво заврши дводневната програма во Делчево, посветена на европската соработка, пријателството и заедничкиот развој на пограничните региони.
Настанот уште еднаш ја потврди улогата на програмата Interreg IPA во поврзувањето на заедниците и претворањето на прекуграничното партнерство во конкретни придобивки за граѓаните.
