Јавната установа Национален парк „Пелистер“ постави нови информативни табли со нов и модерен дизајн за националниот парк „Пелистер“.
Според одлуката на менаџментот, поставувањето на новите инфо-табли е со цел да ја промовира важноста и културно-историското значење на петтоигличестиот бор молика.
-Моликата позната и како Македонски Бор е пронајдена во далечната 1839 година, и тоа е само еден од поводите да продолжиме со приказната за НП Пелистер како жив музеј на богатиот биодиверзитет, богатата историја и нераскинливата врска помеѓу локалното население и природата, истакна Иванчо Тошевски, директор на ЈУНП „Пелистер“-Битола.
Нови инфо табли се поставени во подножјето на планината Баба, како и во најпосетената зона на паркот, а подоцна со истиот дизајн ќе следи и поставување на нови табли на планинарските и на велосипедските патеки, посочија од таа национална установа.
