Во Музејот на современа уметност вечерва ќе се одржи културен настан насловен „Гласот на ромската жена“ во организација на Ромскиот културен и медиумски центар „Бариканипе“ од Скопје.
Настанот се организира по повод Меѓународниот ден на Ромите – 8 Април, а во рамки на одбележувањето ќе биде промовирана книжевната едиција „Авантурите на лавот Лео“, составена од четири сликовници на ромски и македонски јазик. Автор на изданијата е младата писателка Џемилиана Абдулова.
Во текот на вечерта ќе бидат доделени и медали за заслуга на пет ромски жени кои, според организаторите, дале значаен придонес за севкупниот напредок на ромската заедница и нејзината афирмација во современото македонско општество.
Ромскиот културен и медиумски центар „Бариканипе“ е здружение на млади студенти, чија работа е насочена кон анализирање и креирање политики, унапредување на културното творештво, поттикнување на издавачката дејност и подобрување на ромското медиумско милје преку продуцирање и едукација на стручен кадар. Во својата работа, здружението соработува со реномирани и истакнати ромски дејци како стручни консултанти.
