Ако енергетскиот сектор на Македонија се натпреваруваше во Европа, би ја поминал групата, но би изгубил во четврт финалето – вака со фудбалски речник, директорот на Секретаријатот на Европската енергетска заедница Артур Лорковски ја опиша состојбата во земјава. Србија, Црна Гора, па дури и Украина лани биле подобри од нас. Македонија се наоѓа некаде на средина во Европа, со имплементирани 53% од европското законодавство. Постигнат бил зёначителен напредок, но имало уште многу работа. Лорковски го критикува производството на струја од јаглен, но и ги пофали направените законски измени во енергетиката.
„Цената на електричната енергија, цената на производството, на тоа ќе треба да се додаде цената на ЦО2, цената за јаглерод диоксид, која денеска е околу 80 евра. Со ова нема да ви биде исплатливо да извезувате струја во Европската унија (струја произведена од јаглен)“ – вели Лорковски од ЕЕЗ.
Пратениците на владејачката ВМРО-ДПМНЕ уверуваат дека енергетиката ќе биде приоритет за развој на економијата во земјава. Потенцираа дека неодамнешната законска интервенција резултираше со спречување на поскапувањето на струјата. Ќе се укинат и Агенцијата за енергетика и Дирекцијата за нафтени резерви кои ќе бидат дел од новото министерство.
„Откако е конструиран овој мандат, во сите закони коишто се усвоени, доминираат законите за енергетика, со што уште еднаш ја потврдуваме нашата заложба за правење на енергетскиот сектор стратешки сектор во функционирање на нашата држава, такашто покрај создавање на ново министерство за енергетика, се усвои и нов закон за кој треба да ги поздравам сите пратеници за кој се успеа да се спречи ценовен шок на електричната енергија“ – вели Бојан Стојановски, пратеник на ВМРО-ДПМНЕ..
Лорковски имаше пофални зборови за работата на Регулаторната комисија за енергетика и нејзиниот претседател Бислимовски. Извештајот на Енергетската заедница се однесува на 2023-та година. Критиките и пофалбите ги слушнаа и поранешниот премиер, а сегашен пратеник Димитар Ковачевски и неговите сопартијци, но не излегоа на говорница да ги продискутираат.
