Водечките европски кардиолози објавија нови препораки за исхрана за пациенти со срцеви заболувања, нагласувајќи дека треба да му дадат приоритет на готвењето дома за да се избегне ултра-преработена храна. Лекарите, исто така, ја нагласуваат важноста на јадењето побавно и избегнувањето оброци доцна навечер.
Европското здружение за кардиологија (ЕЗК, со седиште во Софија Антиполис, Франција) нагласува дека ултра-преработената храна „стана значаен проблем за јавното здравје“ и е поврзана со зголемен ризик од дебелина, дијабетес тип 2 и висок крвен притисок. Објавата нагласува и дека бројни студии покажале оти консумирањето таква храна „е поврзано со зголемен кардиоваскуларен ризик, честопати независно од целокупниот квалитет на исхраната“. Меѓутоа, се вели, штетата од ултра-преработената храна не е препознаена во тековните совети за исхрана дадени во кардиолошките клиники.
„Тековното клиничко советување за исхрана честопати ги занемарува потенцијалните штетни последици од ултра-преработената храна, оставајќи ги пациентите без сеопфатни упатства за исхрана“, се истакнува во соопштението.
Практични совети за лекари и пациенти
За да им се помогне на пациентите, стручњаците понудија неколку практични совети. Според нив, лекарите треба да ги охрабрат пациентите да се насочат кон готвено дома, да јадат побавно и да избегнуваат оброци доцна навечер.
„Кардиолозите можат да ги охрабрат пациентите да јадат повеќе готвено дома, со тоа што ќе ги прашуваат за нивните тековни навики за готвење и ќе им обезбедат едноставни ресурси за планирање оброци или ќе ги упатат до служби за исхрана. Советувајте ги пациентите да ѝ дадат приоритет на храната со висока содржина на влакна, минимално преработена и да практикуваат побавно, внимателно јадење за да се зголеми ситоста и да се намали прејадувањето со ултра-преработена храна“, се истакнува во упатствата.
Извештајот, објавен во „Европскиот журнал за срце (European Heart Journal)“, препорачува и „разговор со пациентите за можните придобивки од избегнување доцни оброци и воспоставување редовни навики во исхраната за поддршка на целокупниот квалитет на исхраната“. Со други зборови, лекарите треба да се сосредоточат на совети против специфични ултра-преработени јадења, вклучувајќи зашеќерени пијалаци, спакувани закуски и преработено месо.
Проф. Луиџина Гуасти од Универзитетот Инсубрија во Италија, која е една од водечките автори на трудот, со свои зборови ја објасни заднината на новите упатства.
– Ултра-преработената храна, направена со индустриски состојки и додатоци, во голема мера ги замени традиционалните диети. Истражувањата посочуваат дека оваа храна е поврзана со неколку фактори на опасност од кардиоваскуларни заболувања, како што се дебелината, дијабетесот и високиот крвен притисок, како и ризикот од развој од срцеви заболувања и смрт. Сепак, овие докази сè уште не се вклучени во советите што им ги даваме на пациентите за здрава исхрана… Се надеваме дека оваа објава од ЕЗК ќе им помогне на лекарите да ја препознаат ултра-преработената храна како потенцијален фактор на опасност и да им дадат јасни упатства на своите пациенти за ограничување на внесувањето таква храна за да ги спречат тие кардиоваскуларни ризици, болестите и смртта, заклучи Гуасти.
Системска поддршка
Коментирајќи ги новите препораки, Трејси Паркер – виша нутриционистка во Британската фондација за срце, додаде дека новите наоди потврдуваат растечки број докази што покажуваат дека брзата храна е штетна.
– Оваа објава потврдува значаен број докази што покажуваат дека исхраната богата со ултра-преработена храна е поврзана со поголема опасност од срцеви и крвни заболувања. Иако поголемиот дел од тековните истражувања се набљудувачки, конзистентноста на наодите низ многу трудови го зајакнува нашето разбирање за врската меѓу вносот на ултра-преработена храна и кардиоваскуларниот ризик, изјави Паркер.
Таа, исто така, рече дека добар почеток е да намалиме со колачи, бисквити и готови закуски.
– Треба почесто да готвите оброци од основни производи – чекори што веќе ги знаеме можат да помогнат во подобрувањето на квалитетот на вашата исхрана и да поддржат подобро здравје на срцето. Постојат ограничувања за тоа што може да направи поединецот. Ни треба средина што го олеснува донесувањето поздрави одлуки. Ова значи користење на владини политики, како што се „Стандардите за здрава храна“ објавени минатата година, за да се подобри пристапот до производи што се помалку преработени и со помала содржина на сол и шеќер, рече Паркер.
