Во просториите на МАНУ, Филозофското друштво на Македонија денеска организира предавање на современиот кинески филозоф Оујанг Канг (Ouyang Kang) на тема „Генеративната вештачка интелигенција и нејзините значења од перспектива на социјалната епистемологија“ (Generative Artificial Intelligence and its Meanings in the Perspective оf Social Epistemology).
Д-р Оујанг Канг извршува повеќе функции на Универзитетот за наука и технологија Хуажонг (HUST), меѓу кои декан на Институтот за државно управување, професор и директор на Институтот за филозофија, директор на Институтот за социјални информациски студии, главен уредник на списанието за општествени науки на HUST и др. Д-р Оујанг е водечки научник во областите на интеркултурните студии, социјалната епистемологија, социјалните информации и филозофијата во Кина.
Има објавено повеќе од 10 книги; негови понови дела се: „Dialog and Reflection: Contemporary British and American Philosophy, Culture and Others“ (2005), „An Introduction to Social Informatics“ (2011), „On the Chinese Road“, 2013). Исто така, уредувал повеќе зборници, меѓу кои Philosophy of Social Science and Humanities (главен уредник, 2001), Map of Contemporary British and American Philosophy (главен уредник, 2005) и др.
Објавил повеќе од 300 трудови на англиски и кинески јазик, раководел со повеќе од 10 национални и меѓународни истражувачки проекти и посетил повеќе од 30 земји за меѓународни конференции, академски предавања и заеднички истражувања. Споменатиот универзитет (Huazhong University of Science and Technology, HUST) спаѓа меѓу десетте најдобри во Кина и, според Шангајската листа, се наоѓа меѓу првите сто универзитети во светот.
