Во тек се градежни зафати во дворот, а завршија во спортската сала кои заеднички ги делат двете велешки средни училишта – СОУ Гимназија „Кочо Рацин“ и ССОУ „Димитрија Чуповски“ попознато како Хемиско. Станува збор за два проекти кои засебно ги реализираат двете училишта, а се во вредност од над 10,5 милиони денари и се финансиски поддржани од Општина Велес.
Во рамките на проектот на Гимназијата „Кочо Рацин“ деновиве се врши уредување на пешачките патеки во дворот кој го делат две училишта, по што ќе се постават и нови клупи и друга урбана опрема.
Како што информира денеска за МИА Илија Попов, директор на Гимназијата „Кочо Рацин“, во рамките на проектот е изведена и нова пристапна патека од паркингот позади училиштата, па до Младинскиот парк, со што се зголеми безбедноста при користењето на спортските терени позади училиштата.
Инаку позади двете училиштата во рамките на новниот проект со заштитна ограда веќе се оградени спортските терени кои ги користат двете училишта, како и граѓаните, а посебно најмладите -децата.
Сите овие градежни зафати се проект на Гимназијата „Кочо Рацин“ и финансиски со околу 4 милиони денари се поддржани од Општина Велес.
Реконструкцијата на покривот на спортската сала која ја користат двете училишта што веќе заврши е проект на Хемиското училиште „Димитрија Чуповски“. Ова училиште во рамките на проектот наскоро ќе ја реновира и фасадата на Хемиска. Проектите кои ги реализира Хемиското училиште се вредни околу 6,5 милиони денари и се финансиски поддржани од Општина Велес.
Изведувач на проектите во двете училишта е велешката фирма „Делта Пром“, а работите треба целосно да завршат до почетокот на идната учебна година.
