Директорот на Бирото за јавна безбедност, Александар Јанев, денеска во Скопје учествуваше на работилница за истраги за компјутерски криминал, организирана со поддршка на Амбасадата на САД. Тој истакна дека меѓународната соработка, размената на знаења и континуираното јакнење на полициските капацитети се клучни за справување со современите безбедносни закани.
На работилницата „Истраги за компјутерски криминал“, што се одржува денеска во Скопје, учествуваат полициски службеници од централните и регионалните служби во состав на Бирото за јавна безбедност.
Во своето обраќање, Јанев посочи дека дигиталниот простор носи сè посложени безбедносни предизвици, а компјутерскиот криминал и хибридните закани бараат современи истражни пристапи, континуирано усовршување и навремена размена на информации.
Тој нагласи дека соработката со Федералното истражно биро (ФБИ) се унапредуваат професионалните капацитети на македонската полиција, се разменуваат искуства за современите истражни методи и се зајакнуваат способностите за откривање и истражување на компјутерскиот криминал, како и за обезбедување дигитални докази од онлајн платформите.
Директорот Јанев упати благодарност до Амбасадата на САД во Скопје, американското Министерство за правда (Department of Justice) и програмата ICITAP за континуираната поддршка, споделеното знаење и партнерството, кои придонесуваат за конкретно унапредување на капацитетите на македонската полиција.
-Нашата цел е јасна – поддршката од партнерите да ја преточиме во трајни знаења, сопствени капацитети и одржливи решенија. Како Министерство, сè повеќе ќе инвестираме и со сопствени буџетски средства и со нашите човечки и професионални ресурси во модернизацијата и јакнењето на полициските капацитети. Само така можеме да изградиме отпорен, ефикасен и одржлив безбедносен систем, подготвен да одговори на денешните и идните закани- истакна директорот Јанев.
На крајот од обраќањето, директорот на БЈБ посочи дека меѓународното партнерство и заедничкото градење капацитети се основа за поголема меѓусебна доверба, подобра превенција и побрза реакција, со крајна цел унапредување на безбедноста на граѓаните.
