Сомнеж за користење на физиолошки раствор наместо хемотерапија, сомнеж за продавање лекови за болни во Македонија за потребите на луѓе од Косово, пациенти без терапија, десетина живи изгорени во Тетово, превртени автобуси со дузина жртви и повредени, ученици без учебници, милионски сомнителен договор за изградба на автопат кој јавноста никогаш не го виде, киднапирања, убиства – ова е слика за Македонија во последниве години.
Скандали, корупција, криминал еден куп, разрешница никаква – Македонија ги живее најтемните години од совето постоење, сметаат дел од аналитичарите. Професорот Божиновски за Алфа вели дека ова веќе не ни личи на држава, особено ако се земе предвид фактот дека аферите се нижат, а разрешница нема.
Се има чувство дека државата е пуштена по инерција, односно дека нема државен апарат, односно држава која ќе може да се справи со сите предизвици со кои се соочуваат граѓаните. Се создава гнев и револт, за тоа дека буквално за ниеден од скандалите нема разрешница, судска. Видовме во случајот со модуларната кабелот беше крив, нема разврска за сообраќајките кај Ласкарци и во Бугарија, ова што се случува со онкологија, гневот е толку поголем со оглед на минатиот учинок, односно неучинок, тоа е немање на никаква одговорност за се она што се случува, граѓаните се гневни за што е дзволено ова да трае континуирано со години ,вели Владимир Божиновски – универзитетски професор.
Божиновски вели, дека е недозволиво за такви сериозни случаи да нема никаква одговорност, дека не се памети време каде што корупцијата била распорстранета како сега, од шалтер во установа, се до врвот на државата, спас се само избори, а власта не ги дава.
Аналитичарите велат дека се чини дека власта е свесна дека ќе изгуби на избори, затоа и се толку незаинтересирани.
Се добива впечаток дека власта целосно се има откажано од било каква иницијатгива или обид да ја поправи онаа перцепција која се создаде изминативе години, а тоа е дека едноставно не е способна да справи со предизвиците кои се пред Македонија…., вели Владимир Божиновски – универзитетски професор.
Според последните анкети граѓанит покрај тоа што не веруваат дека државата се движи во правилна насока, главен проблем за нив е корупцијата и криминалот, а судејќи според бројките власта се повеќе и повеќе ја губи довербата кај народот, токму заради инертноста и нефункционалноста на институциите.
