Силно невреме проследено со пороен дожд, грмежи и силни налети на ветер денеска ја зафати Атина и нејзината околина, додека циклонскиот бран погоди и повеќе делови од северна Грција, предизвикувајќи штети врз инфраструктурата и сериозни проблеми во сообраќајот, јавуваат грчките медиуми.
Според весникот „Катимерини“, обилните врнежи предизвикале поплави во централниот дел на Атина и во Пиреја, каде што силниот ветер уривал кровови и скелиња од згради, а на повеќе улици сообраќајот бил привремено во прекин.
Грчката противпожарна служба интервенирала по повеќе од 150 повици за испумпување вода од поплавени домови и деловни објекти, како и за отстранување на последиците од невремето, при што околу 60 интервенции биле само на подрачјето на Атина.
Во текот на попладнето невремето ги зафатило делови од централна и северна Грција, додека уште во утринските часови силни бури биле регистрирани над Јонското Море.
Особено тешка била состојбата на Олимп, каде што силен град и снег ја прекриле планината, а удар од гром предизвикал пожар во близина на Волос.
Снимките што ги објавуваат грчките медиуми и граѓаните на социјалните мрежи сведочат за силината на невремето во повеќе региони низ земјата.
Силно невреме ја погоди и Ламија, како и западниот дел на Фтиотида, каде што градот предизвикал големи штети во овоштарниците и земјоделските површини. Според локалните извештаи, само 15 минути пороен дожд и град биле доволни за да предизвикаат сериозни проблеми на националниот автопат и на регионалната патна мрежа.
Град паднал и во Гревена, каде што биле оштетени посеви и автомобили, а сообраќајот бил значително отежнат.
Претходно, грчките власти издадоа итно предупредување за опасни временски услови и го активираа системот за итни известувања „112“, испраќајќи СМС-пораки до граѓаните и туристите.
Според „Катимерини“, поради сериозноста на временската состојба, Генералниот секретаријат за цивилна заштита на Грција активирал црвен метеоаларм за 11 региони, а надлежните служби се ставени во состојба на целосна мобилизација.
