Колони од смачкани, превртени и опожарени возила се протегаат по бугарскиот автопат „Тракија“, ова е последицата на двата верижни судири во Бугарија во кои загинаа најмалку 11 луѓе а 48 се повредени. Првиот итен повик за верижна несреќа стигнал околу 7:10 часот наутро. Несреќата се случила во правец на Бургас. Кратко време потоа, на патот во правец на Софија се случил и вториот судир. Според првичните информации во судирите учествувале околу 50 возила а причината за несреќата, според сведоштвата на преживеаните е густата магла која го покрила автопатот.
„Еве видете, јас сум со таа црната. (Што се случи?) густа магла, многу густа магла. Четири автомобила се удрија во мене и камиони, како излегов и што се случи. Благодарение на господ што сум жив“
„Сите прозорци беа скршени, паѓаше стакло од горе. Бевме еден врз друг. Кој и паднал, кој се удрил, кој се заглалил, не можел да излезе. И кога излеговме надвор, почнавме да се оддалечуваме од автобусот“
„Страшно. Црвениот камион нè удри одзади. Само го почувствував камионот како доаѓа одзади при сопирање. Му реков на колегата да се држи, ќе нè удрат“, изјавија преживеаните
Несреќите ја прекинаа и средбата помеѓу премиерот на Бугарија, Румен Радев и еврокомесарката Урсула Фон Дер Лајен. Радев информираше дека поради несреќата откажани се сите средби и активности планирани за посетата на претседателката на ЕК, што требаше да се одржат во Варна. Откажана е и денешната седница на владата. Сред прес-конференцијата со Фон Дер Лајен, Радев ја соопшти веста за загинатите.
„Веста за трагедијата на автопатот „Тракија“ со толку многу загубени животи ја чувме за време на летот на нашиот авион кон Варна. Веднаш по нашето пристигнување му наредив на министерот за внатрешни работи, министерот Демерџиев да го земе владиниот авион и да ги однесе ранетите во Софија“, изјави Румен Радев, премиер на Бугарија
Покрај ова, во Бургас беа испратени и два воени авиона „Спартан“ но тие се вратија празни бидејќи состојбата на повредените кои се сместени во болниците во Бургас, Сливен и Јамбол е пресериозна за да можат да бидат безбедно транспортирани по воздушен пат. Фон Дер Лајен изрази длабоко сочуство кон жртвите, повредените и нивните семејства и им оддаде почит на спасувачките тимови. Бугарските власти информираат дека е формиран кризен штаб за координација со спасувачките активности по тешкиот верижен судир на автопатската делница.
