Претставници на младински организации, институции, општини и други чинители во областа на младинските политики ќе учествуваат на Националниот форум за младинска работа, што од денеска се одржува во Охрид.
Форумот се одржува во Младинскиот центар во Охрид и претставува национална платформа за поврзување на организациите и институциите што работат со младите и креираат или спроведуваат младински политики, со цел размена на искуства и идеи, споделување добри практики и унапредување на соработката во оваа област.
Програмата на Форумот предвидува панел-дискусии, работилници, презентации и интерактивни сесии посветени на различни аспекти на младинската работа.
Официјалното отворање на Форумот е предвидено за утре, со обраќања на претставници на Министерството за социјална политика, демографија и млади, Програмата за развој на Обединетите нации (УНДП), Фондот за население на Обединетите нации (УНФПА), Националната агенција за европски образовни програми и мобилност, Општина Охрид и Коалицијата на младински организации СЕГА, како организатор на настанот.
Во рамки на Форумот ќе биде доделена и националната награда „Младински пријателски град“, со која ќе бидат наградени осум општини, по една од секој плански регион, за постигнатиот напредок во спроведувањето на обврските и стандардите предвидени со Законот за младинско учество и младински политики.
