Инспекторите засилено на терен, од почетокот на годинава посетиле дури 80% од продажните места на големите маркети, а засилени контроли има особено во последниве две недели.
Засега не се забележани поголеми промени на цените, ниту во маркетите, ниту кај трговците и добаувачите.
„Забележани се поскапувања на одредени производи, но тоа е поради покачување на цената на влезните фактури, кои пак се зависни од цената на увозниците. Се очекува во следниот период намалување на цените на зеленчукот, овошјето, јајцата и лебот“, информираат од „ДПИ“.
И од Комисијата за заштита на конкуренцијата тврдат дека во моментов законот за фер трговски практики се применувал во целост и не биле забележани отстапувања.
„Засега трговците и добавувачите се движат во рамки на законските обврски. Нашите контроли се насочени само кон односот добавувач – трговец. Крајната цена не зависи од законот за трговски практики, бидејќи маржата е пазарно регулирана и таа не е под наша надлежност“, велат од Комисијата за заштита на конкуренцијата“.
Единствено позначително поскапување од по околу 10% засега има кај јајцата и маслото. Од Министерството за економија велат дека тоа е резултат на берзански раст на цените на сировините.
Министерството е подготвено да реагира со прецизни и насочени мерки доколку се детектираат неоправдани ценовни отстапувања. Приоритет останува заштитата на граѓаните, со посебен фокус на ранливите категории, соопштуваат од Министерството за економија.
Надлежните тврдат дека за некој ден на пазарот ќе се појават и македонски раноградинарски производи, со што се очекува цената на краставицата, зелката и компирот да се намали. Се очекува и поголем принос од живината во пролетните месеци, со што директно ќе се влијае на цената на јајацата.
