На денешната средба со партнерите од владејачката коалиција постигнавме целосна согласност за финалната верзија на пакет-законите за реформи во високото образование, значаен чекор кон пофер, поквалитетен и поинклузивен систем, наведува Вреди во соопштение кое МИА го пренесува интегрално.
ВЛЕН јасно потенцира дека овие реформи не се само законски измени, туку конкретна заложба за изградба на одржлива и конкурентна академска иднина. Укинувањето на Х-Индексот како основен критериум за избор на академски кадар претставува исправна одлука, која го одразува реалниот контекст и потребата од побалансирано и меритократско вреднување. Како резултат на тоа, ниту еден вработен нема да го изгуби своето работно место. Напротив, ќе се воспостават нови механизми што ќе го поттикнуваат професионалниот развој и напредувањето на академскиот кадар. Универзитетите ќе добијат поголем простор за квалитетен развој и функционална автономија.
Во текот на целиот процес, претставниците на ВЛЕН беа во континуирана комуникација со ректори и професори, обезбедувајќи реалните барања на универзитетите, особено на албанските, директно да се рефлектираат во оваа реформа. Одлуката за рангирањето за организирање на трет циклус на студии да го вршат најдобрите универзитети претставува стандард што го зголемува квалитетот, при што универзитетите на албански јазик ќе бидат активен и конкурентен дел од овој процес.
ВЛЕН гарантира дека со овој закон универзитетите на албански јазик, не само што нема да бидат оштетени или маргинализирани, туку ќе бидат поставени во рамноправна и достоинствена позиција со сите други високообразовни институции во државата.
Конкретен пример за тоа е и историската инвестиција од околу 40 милиони евра за кампусот на Универзитетот „Мајка Тереза“. Нашата цел е јасна – универзитетите на албански јазик да бидат во првите редови, зајакнати и конкурентни на национално и на меѓународно ниво.
