Лекарите и медицинскиот персонал од штипскиот Здравствен дом „Панче Караѓозов“ денеска ја одбележа европската недела на имунизацијата. Со делење на едукативен материјал и пригодна програма на Градскиот плоштад „Слобода“ здравствените работници порачаа дека вакцините се најсилната заштита од опасни заразни болести и не се важни само за децата, туку и за повозрасните генерации.
-Денеска ја одбележуваме Европската недела на имунизацијата. Го одбравме Градскиот плоштад во Штип, за да бидеме поблиску до граѓаните, да ги запознаеме со придобивките од вакцинацијата, да поделиме рекламен материјал – флаери. Знаете вакцините најчесто асоцираат на најмладата возраст, но како што кажав, вакцините делуваат на секоја генерација, така што се опфатени и повозрасните генерации, како средношколската возраст, и повозрасната популација – изјави Горан Андов директор на ЈЗУ „Здравствен дом „Панче Караѓозов“-Штип.
Во Штип, над 90 проценти од децата се вакцинирани што се оценува како висок опфат. Педијатарот, Драгана Миновска-Рунтева, вели дека расте интересот и за ХПВ вакцината, која веќе ја примаат и момчиња и девојчиња.
– Имунизацијата е клучна, бидејќи штити од сериозни и опасни заразни болести, а воедно ги намалува и трошоците во здравствениот систем-вели Рунтева.
Здравствените работници апелираат граѓаните да не ја занемаруваат имунизацијата и редовно да го следат календарот за вакцинација. Потсетуваат дека колективниот имунитет е клучен за заштита на најранливите категории.
