Во организација на македонската амбасада и Културно-информативниот центар, во Тирана беше одржана пригодна свеченост по повод 5 мај – Денот на македонскиот јазик.
-Вршителката на работите во Амбасадата, Радмила Стојмировска истакна дека оваа година се одбележуваат 81 година од усвојувањето на македонската азбука и го потенцираше значењето на јазикот како столб на нашиот национален идентитет, кој ја обединува заедницата и го чува богатството на македонската култура и литература, објави македонската амбасада.
Стојмировска ја нагласи и важноста на македонскиот јазик за македонското национално малцинство во Албанија, како и активностите на Амбасадата за негово изучување, вклучувајќи онлајн курсеви за деца и возрасни и иницијатива за воведување на македонскиот јазик како наставен предмет на Факултетот за странски јазици во Тирана.
На настанот се обратија и директорката на Културно-информативниот центар, Ема Потевска-Попивода и лекторката по македонски јазик на Факултетот за странски јазици, Верица Мукоска.
Студентите кои го изучуваат македонскиот јазик го збогатија настанот со поезија од Блаже Конески и Петре М. Андреевски, потсетувајќи дека јазикот се сака и се учи со срце.
На одбележувањето присуствуваше и претседателката на Здружението „ВМРО ДПМНЕ Албанија“, Елена Симонофски, која вели дека македонскиот јазик не е само средство за комуникација, туку е дел од нас, од нашата историја и нашето постоење.
-Настан исполнет со емоции, гордост и љубов кон нашиот јазик, каде што заедно со многу Македонци и пријатели на нашата земја ја почувствувавме силата на зборот, традицијата и идентитетот што нè поврзува. Особено ме радува што младите, преку поезијата и уметноста, го негуваат македонскиот јазик и го пренесуваат понатаму. Горда сум што што бев дел од овој значаен настан, рече Симонофска.
