Претседателот на Владата Христијан Мицкоски во вечерашното интервју во емисија на една од телевизиите, вели дека формирањето на Специјалното јавно обвинителство претставувало сериозен удар врз правдата, посочувајќи дека уште од самиот почеток било поставено на неуставни основи. Наместо да испорача правда, како што рече тој, правеле естрада.
– Чувството кај граѓаните потекнува од, условно кажано, работи кои се случија во минатото и коишто мислам дека зададоа силен удар врз правдата во Македонија. Првиот е оној период 94–98 година кога ВМРО-ДПМНЕ беше вонпарламентарна опозиција и кога судиите се избираа во Собранието. Кога практично тогашната власт, којашто беше со акламативна моќ, избра стотици судии од коишто дел се сè уште активни судии. И тоа беше политички обоена структура – изјави Мицкоски.
Вториот удар на правдата, истакна Мицкоски, е кога се донесе Специјалното јавно обвинителство.
– Тотално неуставен имплант кога од тие коишто требаше да ја донесат правдата, ништо повеќе од естрада не видовме. Тогаш се правеа беџови, маици се штампаа, капи се носеа, дуксери СЈО. Не можете со неправда да донесете правда. Од самиот старт тој имплант е неправеден, неуставен. Не може да делувате на тој начин. И за тој имплант се виновни сите партии, бидејќи консензуално беше донесено. Сега не сакам да го оградам ВМРО-ДПМНЕ. Јас не го исклучувам ВМРО-ДПМНЕ. Но, тој имплант создаде таква перцепција, уште посилна кога се случи третиот проблем. А тоа е кога заврши во еден куфер пари. Сè се тоа процеси кои во граѓаните создадоа чувство на недоверба во правдата – изјави Мицкоски.
