Ангола и Намибија се согласија да ги прифаќаат назад своите државјани – нелегални мигранти и лица осудени за криминал, откако британската влада се закани со воведување визни санкции за земјите што одбиваат соработка.
Британското Министерство за внатрешни работи соопшти дека на Демократска Република Конго ѝ е укината забрзаната постапка за визи поради недоволна соработка со Лондон. Министерката за внатрешни работи, Шабана Махмуд, предупреди дека е можна и целосна суспензија на визите доколку состојбата не се подобри.
Мерките се дел од новата британска политика за заострување на миграциските правила и забрзување на депортациите. Според официјални податоци, Велика Британија минатата година депортирала над 50 илјади лица без право на престој, што е зголемување од 23 проценти.
